Leanne大學修讀生物學，畢業後從事環保與廢物處理政策相關工作。工餘時在中心當生態導賞員，又與友人成立環境教育界第一個正式工會。
Leanne：「我希望自己帶嘅導賞團係有啟發性。好多時參加者會問我動植物名，個人覺得除咗記得物種名，仲可以諗吓自己可以做啲咩去保育大自然。我本身工作同回收有關，會特別留意松林廢堡嘅BB彈問題*。我會鼓勵參加者即場執BB彈，強調環保最緊要係實踐。對住小朋友我會額外講故仔，叫佢哋幻想吓候鳥咁辛苦遷徙，以香港為中轉站，點知發現呢個地方周地都係膠粒垃圾......你就會見到啲小朋友好落力咁執（笑）。
「今年四月同朋友成立工會。以往環境教育界缺少正式平台去討論員工權益，透過公開分享資訊、俾同行知道有求助渠道，長遠可以令整個行業進步。有人想入行或轉工，又可以上工會Facebook睇到相關資訊，揀間啱嘅公司。
坦白講，現行法例對環境教育界勞工嘅保障並唔足夠。以往同行遇到唔公平嘅待遇，只可以同朋友傾訴。有咗工會，就可以同我哋反映。工會會一齊討論同建議解決方法，或轉介俾其他大型工會組織跟進。
現時工會希望可以吸納更多會員，無論係全職或者兼職都歡迎加入。粗略估算呢行有2000人，而家有約200個會員。會員增加可以交流更多資訊，為大家爭取權益時嘅話語權就會更大！」
詳情可以瀏覽工會Facebook: https://bit.ly/324nsTM
*龍虎山郊野公園內的松林廢堡是二戰遺跡，野戰愛好者在該處遺下大量BB彈，造成塑膠污染，影響自然生態。
